واجه مولانا گرگیج: اگاں مارا ماں وزیرجاهءَ جاهے نیست کم چه کم مارا ماں سفیر جاهءَ جاهے ببیت

واجه مولانامحمد حسین گرگیج، اهلسنتءِ دوستناکیں جمعهءِ پیشنماز ماں آزاد شهرءَ ، ماں وتی جمعهءِ وعظانی گڈی بهرءَ گوں اشاره په نوکیں استخداماں چه روحانیءِ دولتءِ نیمگءَ پرمائینتی: ما اهلسنتءَ امیت هست أت که روحانیءِ دولت ، وتی داتگیں وعده یانی پدءَ اهلسنتءِ کارزانتیں واکاں ماں ملکءِ وزارتءُ إے دگه کارمستری پستاں کار بندگ ببنت، بلے گوں اپسوزیءَ إے واهگ پوره کنگ نبوتءُ اهلسنتءِ جاه ماں وزارتءَ خالیگ إنت.

واجهءَ دیمترءَ  گوشت: مارا امیت هست که ماں سفیر جاهءَ اهلسنتءِ واکاں کار بندگ ببنتءُ مارا سنی إیں سفیر هں ببیت .
دارالعلوم فاروقیهءِ گالیکشءِ مدیرءَ پرمائینت: اهلسنتءِ ورنایاں په کار بزور إت. اهلسنت نیکینءُ امانت داریں مردم أنت اگا ں شما چه آیاں کار بگرإت چه آیاں هچ وڑیں خیانتے نگند إت.
مولانا گرگیجءَ دیمءَ پرمائینت: برے برے لهتے دوستاں ایراد گر أنت که شماءُ مولانا عبدالحمید مدام تبعیضءِ دور کنگءِ بارهءَ گپ جن إت ؛ بلے ما تبعیضے نگندإیں.
مئی جواب په آیاں إشنت که اگاں حقیقتا تبعیضے نیست؛ی گڑا شما یک رسمی آمارے مارا پیش دارإت که اهلسنتءِ کار بلداں ماں کجام یکے چه مهمینءُ کلیتی إیں پستاں په کار گلائیش أنت.
اگا ں چوشیں چیزے هست گڑا ماری پیش دارإت. ما چه آیاں منت واری کن إیں هما وڑءَ که پیشترءَ یک معاونے په نفتءِ وزیرءَ گچین کنگ بوتءُ ما هم وتی منت واریءَ جاڑ جت .