دینی جـستءُ پَسّه

جست: اگاں شخصیءِ گوانکو (موبایل)ءَ نمازءِ تها زنگ وارت، آ شخص چنت برءَ تۏنیت که تلفنءَ بند بکنت؟

پَسَّه: گوانکوءِ بندکنگ ماں نمازءَ گۏں کمّٻں عملے (عمل قلیلی) تا سَے برءَ روا إنت، بلئے شرط إشنت که إے سئٻں بَر، ماں یک رکنیءِ توکا رندپه رند مبنت کم چه کم آیانی میانءَ یک «سبحان ربی الأعلی»ءِ اندازهءَ فاصلهءُ جدائی ببیت؛ پچے که لهتے فقهاءِ گورءَ آ کمّٻں عملے که چنت برءَ، رند په رند ببیت، آئی مزنٻں عملے حساب بیتءُ نمازءَ پرۏشیت. پَمشا احتیاط لازم إنت.

جست: آیا لَیب کنگ گۏں گۏشیءَ جائز إنت یا ناں؟
پسه: چۏشٻں لیبءُ گوازی، سوَب بنت که انسانءِ وهد په هدر بروت. په هر مسلمانیءَ ضروری إنت که چه ناهودگٻں کاراں دست بکشّیت. حضرت ابوهریره چه پیغمبر-صلی الله علیه وسلم- ءَ نقل کنت: «من حسن إسلام المرء ترکه مالا یعنیه»؛ یک نشانی إے چه شخصءِ اسلامءِ پَکّائیءَ، ناهودگٻں کارانی ویل دیگ إنت.

جست: آیا گۏشیءِ زنگءِ جاهءَ، نازٻنکءُ گاناءِ إٻرکنگ جائز إنت یا ناں؟
پسه: جائز نه إنت بلکٻں مزنٻں گناهے حساب بیت.
مان حدیث شریفءَ آتکگ: صوتان ملعونان فی الدنیا والآخرة مزمار عند نعمة، ورنة عند مصیبة.

جست: آیا روا إنت که قرآنءِ آیات یا پیغمبر-صلی الله علیه وسلم- ءِ حدیثءُ دعایاں ماں گۏشیءِ حافظهءَ ذخیره کنگ ببنت؟
جواب: جائز إنت، په إے شرطءَ که آیانی احترام إٻرکنگ ببیت.

جست: (الف) «پُرس» چیءَ گوش أنت؟ (ب) آیا اسلام ءِ تها پرسءُپاتیاءِ گِرگ جائز إنت یانه؟ (ج) لهتے جاهءَ وهدے که یکے مِریت آئیءِ مردم تاں40 روچءَ آرۏس نجن أنت، إے کار شریعتءِ تها چتورإنت؟
پسه: (الف) پرس، هانٻں مردگءِ مردماں تسلیت گوشگءُ آیانءَ دلداری دیگءُ په صبرءَ وادار کنگ. (ب) اسلامءِ تها همے اندازه پرس جائزإنت که په میتءِ سیادءُ وارثاں تسلی إے ببیت مثلا همینچو بس إنت که آیانی گورءَ بروتءُ إے دعاءَ بوانیت: أعظم الله أجرکم وأحسن عزاکم وغفر لمیتکم. (ج)إے اندازه په میتءِ سوگءُ پرسءَ نندگ جائز نه إنتءُ شریعتءِ توکءَ پرس بس سے روچ إنت.

جست: یک شخصیءَ وتی لۏگءِ دٻمءَ یک مزنٻں ڈگارے هستءُ إے شخص ماں آ زمینءَ کشاورزی کنت، آیا ثمره إے که إے شخص، چه آ زمینءَ درکاریت آیانی سرءَ دهیک(عشر) واجب إنت؟
پسّه: إے مسئلهءَ دو صورت هست،
اول: اگاں آ زمین، بُندرءَ نندگی(مسکونی) زمینے بیتگ، بلئے رند چه لۏگءِ بندگ ءَ آشخص کیتءُ وتی لوگءِ دیم ءَ کشاورزی کنت، إے صورتءَ دهیک واجب نه إنت.
دوم: زمین، بندرءَ کشاورزی ڈگارے بیتگ بلے رندءَ آئیءِ سرءَ لۏگ بندیت، إے صورتءَ دهیک واجب إنت.

سرچمگ: ندای اسلام 51ءُ31